صور| إزاي تقضي فسحة في الأقصر بأقل الأسعار؟

صور| إزاي تقضي فسحة في الأقصر بأقل الأسعار؟ معبد الكرنك .. تصوير أبو الحسن عبدالستار

يعتقد الكثير من الأشخاص، أن قضاء فسحة في الأقصر، أمر صعب ويحتاج الكثير من الأموال نظرًا لطبيعة المحافظة السياحية، ظنًا منهم أن أسعار الإقامة بها أو المطاعم والأماكن الأثرية مرتفعة، وهو أمر غير صحيح.

 

ويقدم “الأقصر بلدنا” دليل شامل لقضاء فسحة في المحافظة بأقل الأسعار.

 

في البداية أفضل وسيلة تيجي بيها الأقصر هي القطارات، لأن الأتوبيسات أو المواصلات العادية متعبة ومرهقة.

القطارات vip

– قطار رقم 976 قيام من القاهرة الساعة 9 مساءً

– قطار رقم 2008 قيام من القاهرة الساعه11 مساءً

القطارات المكيفة

– قطار رقم 988 قيام من القاهرة الساعه 7 مساءً

– قطار رقم 996 قيام من القاهرة الساعة 10 مساءً

– قطار رقم 934 قيام من القاهرة الساعه 1 مساءً

 

أول ما توصل الأقصر، هتلاقي مبنى مركز الاستعلامات السياحي لو حابب تسأل أو تستفسر عن حاجة، وبعدين لو حابب تاخد تاكسي هتلاقي أمام المحطة وتعريفته بـ 15 جنيه، أما لو عايز مواصلات عامة هتلاقي ميكروباصات تعريفتها بجنيه ونصف.

 

الإقامة والزيارات

تذخر محافظة الأقصر بالعديد من الفنادق السياحية ذات الخمس نجوم، والتي ترتفع أسعار الإقامة بها بشكل كبير، لكن هناك أيضا فنادق أخرى سياحية وأسعارها في متناول المواطن العادي، وإليك أفضل 10 فنادق ذات أسعار رخيصة.

وتنقسم الأقصر إلى منتطقتين يمر بينهما النيل، وهما البر الغربي والبر الشرقي، “وعشان تروح من البر الشرقي للغربي أو العكس، هتركب معدية بنص جنيه”.

 

وبالنسبة للإقامة في البر الشرقي، بنرشحلك الفنادق دي:

– فندق القديس، 3 نجوم، تكلفة الإقامة للغرفة المفردة 240 جنيهًا، والمزوجة 300 جنيه، والثلاثية 360 جنيه، الأسعار شاملة وجبة الإفطار فقظ.

– فندق إيزيس بيراميزا الأقصر، ودا على كورنيش النيل في وسط المدينة، على بعد كيلو متر من معبد الأقصر، بيوفرلك غرفة مكيفة على النيل، وسعر الغرفة المفردة شاملة الإفطار 450 جنيهًا، والمزودجة 600 جنيه، والثلاثية 820 جنيه.

– فندق إيتاب، ودا جنب ديوان عام المحافظة بين معبد الأقصر والمتحف، وسعرالغرفة المفردة 350، الغرفة المزدوجة 500 جنيهًا، والغرفة الثلاثية 650 جنيها، شاملة الإفطار.

– فندق نفرتيتي، موجود في وسط البلد قدام معبد الأقصر، وممكن تحجز بالتليفون: 01000329991- 01006016132، سعر غرفة لفرد واحد 250 جنيهًا بالإفطار، لو غرفة مزدوجة سعرها بيكون 350 جنيهًا، وهتلاقي غرفة 3 أفراد سعرها 450 جنيهًا.

– فندق إيميلو، موجود في شارع يوسف حسن قدام سوق سافوي جنب السنترال القديم، وسط مدينة الأقصر، وممكن تحجز بالتليفون رقم 0952373570، وسعر الغرفة لفرد واحد 250 جنيهًا، ولو غرفة مزدوجة 350 جنيهًا، أما الغرفة 3 أفراد 450 جنيهًا، الأسعار دي شاملة وجبة الفطار فقط.

– فندق رويال هاوس، موجود في شارع المعهد الديني أمام نادي المدينة المنورة وسط مدينة الأقصر، وممكن تحجز برقم التليفون 0952280077، وسعر الغرفة لفرد واحد 200 جنيهًا، والمزدوجة 280 جنيهًا، والغرفة 3 أفراد 360 جنيهًا، الأسعار دي شاملة وجبة الفطار فقط.

– فندق فونتانا، موجود في شارع رضوان المتفرع من شارع التليفزيون أحد أشهر شوارع الأقصر، حوالي 800 متر من محطة قطار الأقصر، وممكن تحجز برقم التليفون 01009598123، وسعر الغرفة الفردية 120 جنيهًا، والغرفة المزدوجة 160 جنيهًا، والغرفة 3 أفراد 200 جنيهًا، وفيه مطعم.

 

أما بالنسبة للإقامة في البر الغربي، بنرشحلك:

– فندق المرسم “مرسم الفنان محمد ناجي”، وهو مصمم على الطراز العربي القديم، مكانه ورا منطقة تمثالي ممنون، وإيجار الغرفة المزدوجة ما بين 350 و400 جنيهًا، شاملة وجبة الإفطار.

– فندق كليوباترا، ميزة الفندق دا إن المطعم على السطح يعني هتشوف الأقصر كلها من فوق، ومكانه على بعد 4 كم من معبد حتشبسوت، وسعر الغرفة المفردة يكلف 180 جنيهًا بوجبة فطار، أما حجز الغرفة المزدوجة بـ 250 جنيهًا.

– فندق كريم، وفيه تراس على السطح بيخليك تشوف معبد الملكة حتشبسوت ومقبرة طيبة، يبعد عن المقابر الفرعونية مسافة 15 دقيقة بالعربية، وهيكون بينك وبين النيل 10 دقايق مشي، وسعر الغرفة المفردة ليلة واحدة 80 جنيهًا من غير وجبات، أما الغرفة المزدوجة فتكلف 140 جنيهًا.

 

الأكل والمطاعم

طبيعة محافظة الأقصر السياحية، كانت سبب رئيسي لعدم وجود مطاعم فول وطعمية كتير، لكن في مطاعم شعبية وسياحية وكافيهات وكافيتريات كتير، فيها الأكل اللي أنت عايزه وأسعارها مش غالية زي:

نادي التجديف وبيطل على النيل في ميدان النوفوتيل قبل فندق الونتر بلاس.

نادي الزراعيين بنزلة الزناتي بالعوامية.

كافيتريا “تيتو” على امتداد شارع التليفزيون، مشهور بالأكل السوري.

كافيتريا عرابيا بالعوامية جنب قصر ثقافة الأقصر.

مطعم أم هاشم، وده موجود في شارع يوسف حسن، أمام طريق الكباش.

مطعم سفرة في شارع محمد فريد بالمنشية.

بعد ما تفطر، هيكون معاك جولة في شارع السوق السياحي أو سوق سافوي، ودا فيه جميع أنواع الهدايا التذكارية والتماثيل الفرعونية والتحف الفنية، وهناك هتلاقي ناس يقدروا ينقشوا اسمك على الرمل في إناء مزخرف بالرمل الملون، أو ينقشوا اسمك على قلادة.. باختصار أنت لازم تعدي على المكان دا.

 

طيب لو معاك أطفال وحابب تفرحهم وتفسحهم وتخرج من جو الآثار شوية، يبقى انطلق على جزيرة الموز في البر الغربي، ودي كلها أشجار الموز الرائعة بجانب النخيل الذي يميز طبيعة محافظة الأقصر الزراعية، وكمان أشجار الفواكه التين والجوافة وغيرها من التي بيتم تقديمها للسائحين والزائرين من أبناء الأقصر.

كمان عندك مدينة “الندى لاند” ودي حديقة حيوانات ومدينة ملاهي، وهتلاقي هناك برضه مطاعم وكافيتريا وطريقها ميتوهش، هتركب سيرفيس “الموقف” بجنيه ونصف، ومن الموقف اركب عربية “أرمنت” بـ3.5 جنيه، وقول للسواق ينزلك عند الندى لاند، وتذكرة الدخول بـ10 جنيه.

بعد مشوار ندى لاند، أنت محتاج تاخد جولة في النيل عشان تشوف جمال الطبيعة بجد، ودا أسهل حاجة ممكن تعملها في الأقصر، ما عليك إلا أنك تقف على الكورنيش وتتفق مع أي فلوكة عشان تاخد جولة وسط آثار البر الغربي والبر الشرقي.

 

ولو أنت لوحدك.. ممكن تتفق مع صاحب الفلوكة على الأجرة، وبتكون ما بين 30 لـ50 جنيه في الساعة، أما لو كنتوا مجموعة فالفرد الواحد 5 جنيه.

بعد جولة النيل، باقي تاخد جولة بالحنطور بقى، هتلاقيهم منتشرين في كل مكان في الأقصر، ودا أجرته بالاتفاق برضه بين 30 لـ 50 حسب المسافة، ونرشحلك تأجر الحنطور من عند ميدان سيدي أبو الحجاج لحد معبد الكرنك، الجولة كلها هاتكون ع الكورنيش، هتكلفك من 30 لـ50 جنيه تقريبا.

طيب كدا انت اتفسحت في البر والبحر، باقي تتفسح في الجو، عشان كدا لازم تجرب رحلة البالون، طيب هتعملها إزاي؟

 

هقولك يا سيدي، في الأقصر فيه أكتر من شركة بتأجر رحلات البالون، وممكن تحجز رحلتك على البالون أون لاين، أو تتصل على أي شركة، الموضوع بسيط.

بمجرد الحجز، هتتواصل معاك الشركة، وقبل معاد الرحلة هتبعتلك مواصلة تاخدك من مكانك لمطار البالون، وبعد ما تخلص رحلتك هيرجعوك لمكان إقامتك تاني.

 

ومعظم أسعار رحلة البالون للمصريين بتتراوح بين 400 لـ500 جنيه، وبيكون في تخفيض للعائلات.

وبنرشحلك الشركات دي:
شركة ماجيك هورايزون للبالون الطائر

الموقع الإلكتروني: http://www.visitluxorinhotairballoon.com

وعنوانها شارع خالد بن الوليد متفرع من التليفزيون بوسط المدينة

التليفون: 0020952274060

أو إيميل:  [email protected]

شركة سندباد للبالون الطائر

الموقع الإلكتروني:

http://www.sindbadballoons.com/contactus.php

وعنوانها شارع عبد الحميد العمدة، جزيرة العوامية، الأقصر

التليفون: 01005385533

إيميل: [email protected]

 

 آثار الأقصر

أكتر حاجة ممكن تعملها في الأقصر، هي إنك تزور الأماكن الأثرية، الأماكن الأثرية كتير، عشان كدا لازم تعمل خطة لزياراتك، وتقسمها ما بين البر الشرقي والبر الغربي.

آثار البر الشرقي

في البر الشرقي ممكن تزور معبد الأقصر، تذكرة الزيارة 20 جنيه، و5 جنيهات للطلبة، والمعبد شارك في تشييده 5 حضارات “حضارة فرعونية – يونانية – رومانية – قبطى – إسلامية”.

ومعبد الأقصر كان في الأصل مبنى لعبادة الإله «أمون رع»، وكان يحتفل بعيد زفافه لزوجته مرة كل عام هناك، فكان موكب الإله ينتقل من معبد الكرنك إلى معبد الأقصر، اقرأ عنه من هنا

بعد ما تاخد جولتك في معبد الأقصر، هتلاقي جنبه مسجد أبو الحجاج الأقصري، ادخل اقرأ له الفاتحة هو والقديسة تريزا، اقرأ أكتر عن الموضوع هنا

 

معابد الكرنك

أيوه معابد مش معبد، عشان بالإضافة لمعبد الكرنك فيه أكتر من معبد تاني، والمنطقة اسمها قدس الأقداس، ومن داخل معبد الكرنك هتقدر تشاهد عروض الصوت والضوء، حاجة مدهشة كدا بتببدأ في المساء وتحكي قصة بناء المعبد.. اقرا أكتر من هنا

تذكرة دخول معبد الكرنك 20 جنيه، و5 جنيهات للطلبة، تبدأ الزيارة من 7 صباحا حتى 5 مساءً، وتذكرة حضور الصوت والضوء 25 جنيه.

بتذكرة الدخول 20 جنيه، تقدر تزور أكتر من مكان في معابد الكرنك، منهم “طريق الكباش”، ودا عبارة عن صفين من التماثيل كل منهم رأس كبش وجسد أسد، وكمان معبد رمسيس الثالث، ودا كان مخصص لاستراحة المراكب المقدسة لثالوث طيبة في عهد رمسيس الثالث.

وبرضه البحيرة المقدسة، وجنبها الجعران الضخم، منقوش على قاعدته صورة أمنحوتب الثالث وهو راكع، وهناك ممكن تلاقي سياح بيطوفوا حواليه عشان جلب الحظ.

 

خلصت جولتك في معابد الكرنك، أدخل بقى على متحف الأقصر، ودا على كورنيش النيل، وفيه قطع مهمة من معابد ومقابر الأقصر، وتذكرة دخوله 20 جنيه، و5 جنيهات للطلبة.

 

بس خد بالك المتحف بيقفل الساعة 2 الظهر، وبيفتح تاني من 5 لـ9 مساء.

مزارات البر الغربي
مقبرة الملك توت عنخ آمون

 

الضفه الغربية عموما كان اسمها قديمًا مدينة الأموات، وفيها مقابر ومعابد جنائزية كتير، أهمهم:

مقابر وادى الملوك والملكات، هتحتاج تأجر طفطف بـ4 جنيه عشان تتجول بمزاج  داخل المكان.

مقابر وادي الملوك منحوتة في الصخر، بتضم مقابر لملوك كتير أشهرهم مقبرة توت عنخ آمون، اقرا أكتر عنها هنا

وفيها كمان مقابر خاصة بزوجات الفراعنة، وأشهرها مقبرة نفرتاري زوجة الفرعون رمسيس الثاني.

أما مقابر دير المدينة فتختلف كتير عن مقابر النبلاء في الاهتمام بحجرة الدفن، وفي الرسومات الرائعة.

الدير البحري، ودا مكان خيال خيال شيدته الملكة حتشبسوت، لأداء بعض الطقوس التي ستفيدها في العالم الآخر.

 

خلصت جولتك في المقابر، هيتبقى معاك المعابد وتذكرة الدخول 20 جنيه، و5 جنيهات للطلبة، بنرشحلك معبد الملك رمسيس الثالث بمدينة هابو، والغريب أنه لسه محتفظ بألوانه، ومعبد الملكة حتشبسوت وهتحتاج تركب طفطف بتذكرة 2 جنيه.

الوسوم